Kaliber setti nýverið í loftið vefinn attin.is – en verkefnið var unnið fyrir Samtök atvinnulífsins. Útlit vefsins var unnið af auglýsingastofunni Árnasynir en Kaliber sá um uppsetningu á vefsíðu verkefnisins, þróun bakenda til að meðhöndla umsóknir sem þangað berast ásamt því að sjá um rekstur vefsvæðis vefsins.

Áttin – ný vefgátt, sem greiðir leið fyrirtækja að umsóknum að starfsmenntasjóðum og fræðslustofnunum, er sameiginlegt verkefni atvinnurekenda og launafólks á almennum vinnumarkaði.

Fyrirtæki innan Samtaka atvinnulífsins hafa lengi óskað eftir einfaldara kerfi og greiðari leið til að sækja í fræðslu- og starfsmenntasjóði. Þau fyrirtæki þar sem starfsmannahópurinn er fjölbreyttur og greitt er í mismunandi stéttarfélög hafa hingað til þurft að sækja til margra sjóða og fræðslustofnana um styrki. Héðan í frá eiga þau að geta sótt um styrki fyrir nær allt sitt fólk með aðeins einni umsókn.

Sjóðirnir sem standa að Áttinni eru IÐAN fræðslusetur, Landsmennt, Menntasjóður Verkstjórasambandsins og SA, Rafiðnaðarskólinn, Starfsafl, Starfsmenntasjóður verslunar- og skrifstofufólks og Starfsmenntasjóður verslunarinnar. Ætla má að sjóðirnir nái til um 110-120 þúsund starfsmanna á almenna vinnumarkaðnum eða um 75-80% starfsmanna.